Dowladda Qatar oo ku dhawaaqday mashruuca dhismaha Dekeda Hobyo.

0
153

Isniin RBB News:- Wasiirada dekedaha Soomaaliya iyo Qatar, Maryam Aweys Jaamac iyo Jassim Bin Saif Ahmed Al Sulaiti ayaa si wadajir ah maanta u shaaciyay in la billaabayo dhismaha Dekeda Hobyo ee goblaka Mudug.

Munaasabadda oo lagu qabtay xafiiska Ra’iisul Wasaaraha Soomaaliya ayaa waxaa goobjoog ka ahaa Ra’iisul Wasaare Xasan Cali Khayre, Ra’iisul Wasaare kuxigeenka dalka, Wasiirka Arrimaha Dibadda Qatar, Madaxweynaha Galmudug, qaar kamid xildhibaannada labada gole, wasiirro iyo wasiirro kuxigeenno ka tirsan xukuumadda federaalka Soomaaliya.

Wasiirka dekedaha Qatar oo Ra’iisul Wasaaraha dalka uga mahadceliyay soo dhaweynta ballaaran ee loogu sameeyo Muqdisho ayaa sheegay in dekadda Hobyo loo dhisayo habka ugu casrisan ee dekad loo dhiso, laga billaabo maantana laga howl gelayo qorshaha dhismaheeda, si shacabka Soomaaliyeed ay uga faa’iideystaan.

Wasiirka dekedaha xukuumadda federaalka Soomaaliya, Marwo Maryam Aweys Jaamac ayaa caddeysay in billaabidda dhismaha dekeda Hobyo ay muhiim u tahay shaqo abuurka dhallinyarada Soomaaliyeed iyo horumairnta dhaqaalaha dalka.

Horraantii bishii Deseembar ee sanadkii 2018 ayaa dowladaha Soomaaliya iyo Qatar waxa ay magaalada Doxa ku lala saxiixdeen heshiisyo horumarineed oo ay kamid tahay dhismaha dekadda Hobyo, waxaana xilligaas wasiirka dekada Qatar, oo kulan gaar ah la qaatay Ra’iisul Wasaare Xasan Cali Khayre uu ballan qaaay in dowladda Qatar sida ugu dhaqsiyaha badan u billaabeyso mashruuca dhismaha dekeda.